متل اليوم من سنتين! …سمير سكاف .
متل اليوم من سنتين، اللبناني يللي عم يفتك فيه الكورونا وعم يغرق عالتيتانيك أكلها قنبلة هيروشيما (مش نوويه)… بذات الوقت! وهالشي حتى حكام لبنان يتأكدو إنو ما في مجال هيدا الشعب يظمطلو شي من رحمة ربنا عليه!
متل اليوم من سنتين كانو اللبنانيي صرلن شي سنه عم ينفذو بالشارع حاله اعتراضيه ضد سلطه فاسده مدعومه بسلاح مش شرعي!
متل اليوم من سنتين، كان في كتير ناس عاديين عايشين حياة عاديه. وكان في أطفال أهاليهم عم يحضرولن تا يكبرو. وولاد مشتاقين أهاليهن يرجعو عالبيت حتى يغمروهن ويبوسوهن. وإخوه ناطرين إخوتهن حتى يتشاركو هموم الدني مع لقمة الإم الطيبه… قبل ما ينكسر ضهر البيات والإمات والإخوه والولاد والقرايب والأصحاب، ومعظم الناس بهالوطن!
متل اليوم من سنتين على الساعة 6:07 بعد الضهر وَقَّف قلب الساعة وجمدت عقاربها. لأنو الزمن اللي جايي ما عاد يشبه الزمن اللي راح!
متل اليوم من سنتين، أول عملية دفن جماعية لملايين من أحلام الضحايا وأهاليهن، حتى قبل ما تنعرف وينيي الأجساد المفقوده!
متل اليوم من سنتين، بلش وجع ونهر دموع مش معروف لا كيف ولا أيمتى بيخلص!
متل اليوم من سنتين، بلشت كمان مع تفجير بيروت، جلجلة البحث عن الحقيقه وتحقيق العداله. وبلشت بعدها تنفضح نوايا السلطه يللي بدها تضليل للحقيقه وللعداله. وهيي بهالشكل وجهت أصابع الاتهام على حالها!
متل اليوم من سنتين، خلق ضمير لبناني جماعي مع قضية تفجير بيروت. ولكن هالضمير تبين بعدين إنو كتير كسلان!
متل اليوم من سنتين، لبنان يللي منعرفو ما عاد يشبه حالو!
متل اليوم من سنتين بلشت صوات الشهدا والضحايا تصرخ لطير الفينيق: قوم… فيق! قوم… فيق! قوم… فيق!